پاکستان نے بھی ایران اور امریکہ کے درمیان کشیدگی کے حوالے سے بڑے اقدامات اٹھا لیے

امریکا اور ایران کے درمیان بڑھتی ہوئی کشیدگی کے پیش نظر محکمہ داخلہ سندھ نے سیکیورٹی الرٹ جاری کر دیا گیا ہے ۔

دو روز قبل ایرانی پاسدارانِ انقلاب کی القدس فورس کے سربراہ میجر جنرل قاسم سلیمانی عراق میں امریکی راکٹ حملے میں ہلاک ہوئے جس کے بعد مشرق وسطیٰ خطے میں تو کشیدگی بڑھ گئی ہے لیکن پاکستان میں بھی اس پر ردعمل سامنے آ رہا ہے۔

اس صورت حال کے پیش نظر محکمہ داخلہ سندھ نے ڈی جی رینجرز، آئی جی سندھ اور تمام کمشنرز کو خط لکھا ہے جس میں کہا گیا ہے کہ امریکی اور ایرانی قونصل خانوں کی سیکیورٹی بڑھائی جائے۔

کراچی میں ملت جعفریہ اور مجلس وحدت مسلمین (ایم ڈبلیو ایم) نے قاسم سلیمانی پر امریکی حملے کے خلاف ریلی نکالنے کا اعلان کیا ہے۔ اس ممکنہ ریلی کے پیش نظرٹریفک پلان ترتیب دے دیا گیا ہے۔

ٹریفک پولیس کے مطابق ریڈ زون سمیت متعدد سڑکیں صبح 10 بجے سے بند ہوں گی۔ترجمان ٹریفک پولیس کے مطابق صبح 10 بجے سے ایم ٹی خان روڈ، مائی کولاچی روڈ، ایوان صدر روڈ، ڈاکٹر ضیائالدین احمد روڈ اورکھجور چوک تک سڑکیں ٹریفک کے لیے بند رہیں گی۔

آئی سی آئی چوک، جناح برج سے ایم ٹی خان روڈ پر جانے والے شہری ٹاور آئی آئی چندریگر روڈ کا راستہ اختیار کر کے اپنی منزل کی جانب جا سکتے ہیں۔مائی کولاچی سے ایم ٹی خان روڈ آنے والے شہری بوٹ بیسن سے کے پی ٹی انڈر پاس تین تلوار کا راستہ اختیار کر سکتے ہیں۔